UNEC-də Müstəqilliyin Bərpası Gününə həsr olunmuş elmi-praktik tədbir keçirilib
Azərbaycan Respublikasının Müstəqilliyinin Bərpası Gününə həsr olunan “Müstəqilliyin bərpası – Azərbaycan dövlətçiliyinin tarixi qələbəsi” mövzusunda elmi-praktik tədbir UNEC-in Heydər Əliyev İqtisadi İrsinin Öyrənilməsi Mərkəzi və YAP Səbail rayon təşkilatının birgə təşkilatçılığı ilə keçirilib. Tədbirin açılış mərasimində Ulu Öndər Heydər Əliyevin və Vətən müharibəsində şəhid olan qəhrəmanların xatirəsi ehtiramla yad edilib.
Tədbirin açılışında çıxış edən UNEC-in inzibati və təşkilati məsələlər üzrə prorektoru, dosent Şaiq Əsgərov Azərbaycanın müstəqillik tarixindən bəhs edib. O, ölkənin siyasi və iqtisadi çətinliklərlə, separatçı təzyiqlərlə üzləşdiyi mürəkkəb dövrdə Heydər Əliyevin dövlət müstəqilliyinin qorunmasında və möhkəmləndirilməsində oynadığı tarixi rolu vurğulayıb. Ş.Əsgərov 18 Oktyabrın xalqımızın azadlıq iradəsini və dövlətçilik ənənələrinə sadiqliyini əks etdirən əlamətdar tarix olduğunu qeyd edib.
Milli Məclisin deputatı Hikmət Məmmədov isə çıxışında Azərbaycanın dövlət müstəqilliyinin bərpasının tarixi əhəmiyyətindən danışıb. Deputat Ümummilli Lider Heydər Əliyevin dövlətçiliyimizin möhkəmləndirilməsindəki müstəsna xidmətlərini və Prezident İlham Əliyevin rəhbərliyi ilə ölkəmizin qazandığı uğurları diqqətə çatdırıb. O, milli dövlətçilik ənənələrinin qorunması və inkişafı istiqamətində həyata keçirilən tədbirlərin vacibliyini altını çəkməyə çalışıb.
Tədbirdə tarix elmləri doktoru, professor Mais Əmrahov Azərbaycan Xalq Cümhuriyyətinin dövlətçilik tarixindəki yerindən və müasir Azərbaycanın təşəkkül mərhələlərindən bəhs edib. Professor, müstəqil dövlətçiliyin davamlılığının təmin edilməsi və milli tarixi irsin gələcək nəslə çatdırılmasının əhəmiyyətini vurğulayıb.
Tədbirin sonunda UNEC Yaradıcılıq Mərkəzinin üzvləri Caniyeva Rəfiqə və Əliyeva Rehanə müstəqilliyə həsr olunmuş şeirlərini səsləndiriblər. Tədbir 18 Oktyabr – Müstəqilliyin Bərpası Gününə həsr olunan videoçarxın nümayişi ilə yekunlaşdırılıb. Bu cür tədbirlər universitet tələbələri arasında vətənpərvərlik ruhunun və milli tarixi biliklərin təbliği üçün mühüm rol oynayır.